Credit Suisse sut squitsch

L'autoritad da surveglianza americana SEC intercurescha credits dispitaivels al pajais en il sidost da l'Africa, Mosambic. La SEC ha inizià in'examinaziun cunter la banca. Quai scriva la gasetta americana Wall Street Journal.

In bajetg da la Credit Suisse - ins vesa mo l'entrada ord la perspectiva da rustg.

Legenda da maletgs: La Credit Suisse sto laschar guardar sin la detta. Keystone

L'autoritad americana examinescha la vendita d'emprests da radund 850 milliuns francs. Ils emprests eran vegnids plazzads il 2013 per - uffizialmain - finanziar il svilup da la pestga sin tons. La regenza dal Mosambic ha però era cumprà equipament militar cun quests daners.

Pliras bancas sut la marella

Dasper la Credit Suisse èn er auters instituts da banca pertutgads d'ina examinaziun, tranter auter la banca franzosa BNP Paribas e la banca russa VTB. Tut en tut duai ir per credits da passa ina milliarda francs. Il Mosambic ha dà ina garanzia federala sin quests credits, malgrà ch'ella n'ha betg dumandà il parlament. Quai saja illegal. Pervi da questa garanzia federala èn ils debits dal stadi creschids per 20%. L'october passà ha il Mosambic perquai annunzià l'insolvenza.

RR novitads 9:00