Gievgia han autoritads a Londra, Paris ed Amsterdam manà tras tschertgas en pliras filialas da la Credit Suisse. Las autoritads hajan discurrì cun intginas persunas, nagin è dentant vegnì arrestà, declera Iqbal Khan, manader da l'administraziun da la facultad da la CS.
Sche singulas persunas èn involvidas en cas u han cuntrafatg a process u directivas, chattain nus ora quai fitg svelt.
L'impuls per l'acziun era vegnì da la chatscha sin defraudants da taglia en plirs pajais europeans. Las autoritads avevan survegnì infurmaziuns davart 55'000 contos suspectus d'ina banca svizra.
Las cifras sajan dentant fitg curiusas, declera la CS. «Il dumber da contos che pertutgan l'administraziun da la facultad en l'Europa è pli bassa che 55'000», declera il manager. El na saja betg segir sch'il proceder pertutgia clientella actuala. La CS saja sa distanziada da las fatschentas cun daners betg suttaposts a la taglia e cun quai era da divers clients.
En quai connex haja la segund gronda banca Svizra pers dapli che 40 milliardas francs da clients. «Nus essan tras cun la regulaziun en Europa», ha Khan declerà. Tut la clientella restanta haja mussà or ch'i hajan pajà taglia sin lur facultad. Quai n'hajan betg mo ils superiurs dals cussegliaders da la banca controllà, mabain er l'organ da controlla da la banca.
Clients che hajan anc adina facultads betg suttapostas a la taglia hajan be pudì crudar tras la rait sche collavuraturs hajan cuntrafatg als sistems da controlla da la banca. Quai saja precis quai che la banca examineschia uss internamain, ha ditg Khan.