Suenter ils cravals dad ier en la citad da Son Gagl ha la polizia arrestà 21 persunas per scleriments. Tenor in pledader da la polizia èn tut las persunas puspè libras. Dus giuvenils sajan vegnids blessads durant las confruntaziuns violentas.
Tenor la presidenta da la citad Maria Pappa sajan las confruntaziuns vegnidas dad ina pitschna gruppa da persunas. Ils blers giuvenils sajan sa cuntegnids ruassaivels. Sper las 21 arrestaziuns èn 33 persunas vegnidas visadas dal plaz. La polizia quinta cun donns da material da 50'000 francs.
Fin 350 persunas en citad veglia
Tenor indicaziuns da la polizia èn sa rimnads il venderdis saira sin la plazza cotschna 300 fin 350 giuvenils. Els èn sa radunads suenter appels en las medias socialas. èn s'inscuntrads plirs tschient giuvenils. La situaziun saja escalada envers las 21:00 la saira. Giuvenils hajan bittà objects envers la polizia. En singuls lieus sajan er vegnids bittads molotovs. La polizia ha sinaquai reagì cun muniziun da gumma, gas lacrimogen e cun controllas da persunas.
La situaziun haja pir sa calmada envers la sonda damaun a las 01:30.
Nagina scuntrada politica
Tenor indicaziuns da l'agentura da novitads Keystone-SDA n'aveva la scuntrada nagin messadi politic. La plazza cotschna a Son Gagl saja tradiziunalmain in lieu d'inscunter da glieud giuvna. La polizia haja dentant fatg attent ils umans giuvens sin la distanza da segirezza pervi da las mesiras da corona.
