Siglir tar il cuntegn

Header

cuntegn

Covid-19 Confederaziun sto bittar 620'000 dosas da vaccin

La Svizra sto dismetter radund 620'000 dosas dal vaccin cunter Covid-19. I sa tractia dal vaccin dal producent Moderna. La data da conservaziun saja scadida, ha confermà l'Uffizi federal da sanadad, BAG, in rapport da radio e televisiun da la Svizra franzosa RTS. 200'000 dosas sa chattian en la frestgera dals chantuns e 420'000 en l'apoteca da l'armada. Las dosas pon vegnir conservadas mintgamai per 9 mais.

Il BAG sto approvar la dismessa da la scharscha da vaccins, sco quai ch'il pledader Grégoire Gogniat ha declerà gievgia saira sin dumonda da Keystone-SDA. Ils custs per la destrucziun muntassan ad in franc per kilogram. I n'è betg da sclauder ch'ulteriuras scharschas han il medem destin, perquai ch'il dumber da vaccinaziuns è sa reducì fermamain ils ultims mais. En las frestgeras da l'armada duain esser anc var 7 milliuns dosas da vaccins. Il matg èn vegnidas distribuidas circa 1200 dosas per di.

Tar ils vaccins ch'èn gia vegnids furnids vegnan vitiers potenzialmain anc las scharschas reservadas tar ils producents. En tut ha la Confederaziun cumprà 34 milliuns dosas per il 2022.

Sch'i dat in surpli da dosas da vaccin pudessan vegnir dadas vinavant fin a 15 milliuns dosas al program da COVAX che emprova da garantir in access global egual e gist a vaccins cunter Covid-19 e che reparta vaccins a pajais en svilup. Las tractativas en chaussa duain anc durar.

audio
Per tadlar: Las novitads da las 07:00
ord RTR Audio dals 27.05.2022.
laschar ir. Durada: 3 minutas 55 Secundas.

RTR novitads 06:00

Artitgels legids il pli savens