Il mument stoppian ins evitar che scolaras e scolars fetschian viadis. Uschia argumenteschan ils organisaturs dal «Di naziunal da l’avegnir» la desditga. En pli saja quai grev da resguardar las reglas da distanza tar ina tala occurrenza.
Perquai stauschan ils organisaturs l’ediziun da quest onn sin il november 2021. La finamira dal «Di naziunal da l’avegnir» è da promover ina libra tscherna da la professiun. Er l’exposiziun da professiun «Fiutscher» che l’Uniun grischuna d’artisanadi e mastergn organisescha è spustada quest onn.
Ristg per 150 giuvenils
Tuttina argumentescha la Federaziun svizra da las uniuns da giuventetgna sco organisatura da la Sessiun dals giuvenils. Ina occurrenza cun radund 150 giuvenils na saja il mument betg da responsar.
Enstagl da l’inscunter datti ils 7 da november ina Sessiun dals giuvenils digitala – cun la presidenta da la Confederaziun Simonetta Sommaruga ed il president dal Cussegl dals chantuns Hans Stöckli.