La Confederaziun duai pudair cumprar vinavant vaccins cunter Covid-19. La cumissiun da finanzas dal Cussegl naziunal è s’exprimida per in credit supplementar. La decisiun da la cumissiun saja crudada cun 12 cunter 10 vuschs, hai num en ina communicaziun. Concret duaja la Confederaziun pudair dar or radund 1 milliarda francs fin la fin dal 2023 per cumprar ulteriuras dosas da vaccin.
Ina minoritad da la cumissiun era da l'opiniun, ch'il dumber da dosas da vaccinaziun che duain vegnir cumpradas saja memia aut. Ella vuleva terminar la finanziaziun tras la Confederaziun da vaccins cunter Covid-19 per la fin da l'onn current.
