Il post sco chanceliera dovria in grond engaschi buc mo durant l'emna, mabain er la fin d'emna e perquai «vuless jeu far plazza a novas forzas», di la chanceliera Corina Casanova. Plans per il temp suenter n'ha ella anc betg. «Per mai eis ei impurtont da ventscher la secunda mesadad digl onn aunc las lavurs ch'jeu hai entschiet. Cunzun las elecziuns dil cussegl naziunal e preparar la legislatura. Perquei hai jeu aunc negin temps da sededicar al futur.»
Ulteriuras infurmaziuns
Casanova, ch'è creschida si a Tarasp e Ruschein, era vegnida elegida il december 2007 sco chanceliera federala. Sut sia direcziun ha la chanzlia federala realisà numerusas refurmas per sustegnair e simplifitgar la lavur da la regenza. Tranter auter er la digitalisaziun da prestaziuns dal stadi. In exempel è la furmaziun dal vote electronic per che era Svizras e Svizers en l'ester sappien separticipar a las votaziuns e elecziuns.
Engaschi per il rumantsch
Er per il romontsch en la confederaziun è Casanova adina s'engaschada cun persvasiun. Ella ha per exempel emploià ina persuna che coordinescha las lavurs dal rumantsch entaifer la Confederaziun. Ed er ella sezza dovra nua ch'ella sa e po il rumantsch... «e seigi quei mo in per plaids per beneventar duront sesidas la glieud, ch'ins vesi, che quei lungatg viva».
La fin da matg è Corina Casanova vegnida onurada per ses engaschi cun persvasiun e perseveranza per il rumantsch e per ina Svizra quadrilingua. Ella ha survegnì il premi SRG.R (guarda artitgel).
RR novitads 11:00
