Siglir tar il cuntegn
Inhalt

Svizra Controllas medicinalas per automobilists pir cun 75

Il Cussegl naziunal ha decidì ch'ils automobilists ston ir a las controllas medicinalas regularas pir davent da 75 onns, actualmain è la limita tar 70 onns.

Medi che fa ina controlla medicinala tar in senior.
Legenda: Controllas medicinals tar automobilists pir cun 75 onns. Keystone

La midada da la lescha va enavos sin in'iniziativa parlamentara da Maximilian Reimann PPS/Argovia che ha chattà ina maioritad en omaduas chombras parlamentaras. Ina maioritad burgaisa è da l'avis ch'ils seniors e las senioras sajan ozendi pli fits che pli baud. Per che la midada giaja en vigur sto er il Cussegl dals chantuns approvar ella.

Mantegnair abilitad da manischar

Thomas Hardegger PS/Turitg ha discurrì d'ina «ponderaziun fallada». Ils tests servian be per pudair mantegniar l'abilitad da manischar. Uschia possia per exempel be vegnir adattà ina medicaziun u ina correcturas dals spievels.

Perquai ha el proponì ch'ins stoppia far cun 70 ina controlla obligatorica. Attesta il medi ina abilitad da manischar absoluta duai la controlla regulara lura pir vegnir fatga cun 75 onns. Sustegnì questa proposta han dentant be la PS ed il Verds.

Per la ministra dal traffic Doris Leuthard ha questa decissiun era da far insatge cun l'atgna responsablada. Il davos onn han var 6000 persunas dà giu voluntariamain il permiss dad ir cun auto suenter l'emprima controlla cun 70 onns.

RR novitads 12:00