Siglir tar il cuntegn

Header

Grafica.
Legenda: 15 chantuns na pon betg pli far l'entir contact tracing. SRF
cuntegn

Contact Tracing Chantuns èn per part als cunfins

En passa la mesadad dals chantuns na dumognan ils contact tracers betg pli da far tut las lavurs da retschertga per reconstruir las chadainas d'infecziuns. En il Grischun è la situaziun il mument sut controlla.

En la Svizra Occidentala na dattan ils chantuns betg pli dumogn a la lavur. Per exempel contacteschan ils chantuns Neuchâtel e Giura mo pli persunas ch’èn infectadas cun il virus e che ston restar en isolaziun. Per far ils telefons a terzas persunas ch’han gì contact cun persunas infectadas, na tanscha il temp dals contact tracers là il mument betg pli. Differents chantuns na dattan plinavant er betg pli dumogn da registrar nua che las persunas èn s’infectadas cun il virus.

Contract tracing: Quants telefons dovri per il sistem d'alarm?

Textbox aufklappenTextbox zuklappen

Betg sulet tgi ch’è vegnì testà positiv sin covid-19, mabain er terzas persunas ch’èn stadas en contact cun persunas infectadas survegnan in telefon dals contact tracers. La finamira è da pudair reconstruir las chadainas d’infecziun ed uschia interrumper quellas.

Ma quanta lavur ha il persunal dal contact tracing il mument sin maisa? Rudolf Hauri, president da l’uniun dals medis chantunals a chaschun da la conferenza da medias dal Uffizi federal da sanadad, ha illustrà quai cun in simpel quint:

  • 10 cas novs ch’han gì stretg contact cun 4 persunas: 50 telefons
  • 50 cas novs ch’han gì stretg contact cun 7 persunas: 400 telefons
  • 100 cas novs ch’han gì stretg contact cun 10 persunas: 1’100 telefons
  • 300 cas novs ch’han gì stretg contact cun 4 persunas: 1’500 telefons
  • Vitiers restia il persunal da contact tracing en contact cun cas pli vegls.

Sco Rudolf Hauri declera, possia la populaziun gidar a las autoritads. Persunas testadas positiv duain infurmar sezs lur contacts stretgs e tals duain sa cumportar precautamain u anc meglier restar en quarantina.

video
Quint ch'illustrescha lavur da contact tracing
Or da Tagesschau Spezial dals 23.10.2020.
laschar ir

Grischun – il mument «in scolar exemplaric»

Almain per il mument vala il chantun Grischun anc sco scolar exemplaric. La situaziun saja survesaivla ed i dettia avunda persunal per il contact-tracing – tranter auter er grazia l’engaschi da la protecziun civila.

video
15 chantuns èn al limit da far il contact tracing
Or da 10vor10 dals 23.10.2020.
laschar ir

RTR novitads 06:00

Artitgels legids il pli savens

Scrollar a sanestra Scrollar a dretga