Siglir tar il cuntegn
cuntegn

Svizra Consumà dapli il settember

Las Svizras ed ils Svizzers han sco gia l'avust er consumà dapli il settember. Quai mussa l’indicatur da consum da la banca gronda UBS.

Ina stizun cun fritgs.
Legenda: Surtut il commerzi en detagl è in dals motivs per l'augment dal indicatur da consum. Keystone

L'indicatur da consum da la banca gronda svizra UBS è creschì il settember sin 1,56 puncts ed è uschia levet sur la media dals ultims onns. Per il mais d’avust è l’indicatur vegni curregì levet engiu sin 1,50 puncts. La raschun per l'augment dal consum saja surtut il commerzi en detagl, scrivan ils experts da la banca gronda. Per la prima giada dapi il schaner 2015 èn las stimaziuns da las fatschentas en il commerzi en detagl numnadamain puspè en il sectur positiv.

Franc pli bass en cumparegliaziun cun l’euro

Era grazia a la svalitaziun dal franc en cumparegliaziun cun l’euro è la cumpatibilitad dal commerzi en detagl sa megliurada, quai ha procurà per questa tendenza ensi. Il mument prevesa l’indicatur in pli aut consum che quai ch’ils experts han prognostitgà per l’entir onn. Pervi dal carschen franà tar l’occupaziun en l’emprima mesadad da l'onn e pervi da l'inflaziun èsi da quintar cun in augment dal consum da 1,3%, scrivan ils economs da l’UBS.

RR novitads 12:00