- Il Cussegl federal vul simplifitgar l'access al certificat e ha tramess differentas propostas en consultaziun.
- Tranter auter duain persunas guaridas survegnir pli svelt e nuncumplitgà in certificat da covid.
- Schluccadas areguard il certificat e las mesiras na vegnia en il mument però a dar naginas. Ils ristgs sajan actualmain memia gronds.
- Proximas decisiuns areguard schluccadas duai dar enturn mez november.
En vista a la fin da las vacanzas d'atun, las stagiuns pli fraidas e las cifras actualas è il Cussegl federal vegnì a la conclusiun ch'i saja anc memia baud per ulteriuras schluccadas. Per proteger ils ospitals dad ina proxim'unda da corona vul il Cussegl federal mantegnair las reglas actualas e decider il november areguard ils proxims pass.
Certificat cun test dad anticorpuls
Il mument survegnan in certificat da covid be persunas che pon cumprovar ch'ellas èn guaridas cun in test. En l'avegnir duai quai era dar in certificat per persunas ch'han fatg in test dad anticorpuls. Il test custa e duai esser valaivel durant 90 dis. En pli vegnan tut ils tests per persunas guaridas prolungads da 180 sin 365 dis.
Tenor il Cussegl federal mussian las datas actualas che l'effect da protecziun suenter in'infecziun saja fitg grond.
Access pli simpel per persunas che na pon betg sa laschar vaccinar
Er per persunas che na pon betg sa laschar vaccinar ord motivs da sanadad duai l'access al certificat vegnir simplifitgà. Bain han quellas persunas gia uss access a restaurants, festivitads ed autras activitads che pretendan in certificat – en l'avegnir duain dentant er ellas survegnir in certificat virtual. Era quel duai valair durant 365 dis.
Svilup actual inquietescha
Ils 10 da settember aveva il Cussegl federal amplifitgà l'obligatori da certificat. Dapi lura è la situaziun sa calmada. Tant il dumber d'infecziuns, ospitalziuns sco er mortoris è sa reducì. Dapi intgins dis stagnescha quest svilup dentant, malgrà vacanzas e bell'aura d'atun. En plirs chantuns crescha il dumber d'infecziuns puspè. Prognosas na possian ins però strusch far, ha communitgà il Cussegl federal. Las proximas emnas stoppian ins dentant puspè quintar ch'il dumber s'augmentia, era perquai ch'i dettia puspè dapli inscunters endadens.
Er il svilup en auters pajas dettia da patratgar. En ils Pajais Bass ni er en l'Israel è il dumber d'infecziuns creschì rasant suenter las schluccadas. En omadus pajais era la quota da vaccinaziun pli u main tuttina sco en Svizra.
Schluccadas tar il certificat n'èn anc nagin tema
Il Cussegl federal ha er discutà areguard schluccadas tar il certificat. Quellas vegnia quai dentant pir a dar, cura ch'i smanatschia nagin privel pli per ils ospitals, independent dal dumber da vaccinads. Quai correspunda er al model da trais fasas. Suenter in'analisa da la situaziun actuala è il Cussegl federal vegnì a la conclusiun, ch'ina schluccada purtassia en il mument memia gronds ristgs per il sistem da sanadad. Finamira saja da tegnair la proxima unda da corona uschè bassa sco pussaivel per ch'ils ospitals na vegnian betg surchargiads.
