Siglir tar il cuntegn

Header

Navigaziun

Il trend actual per las elecziuns dal Cussegl naziunal mussa per 3 partidas ina tendenza ensi.
Legenda: Il trend actual per las elecziuns dal Cussegl naziunal mussa per 3 partidas ina tendenza ensi. RTR
cuntegn

Svizra Constellaziun resta: PPS resta la gronda, PLD gudogna, PES perda

Sch'il pievel svizzer avess elegì ils 26 da settember, lura avess la PLD survegnì enturn 16,7% da las vuschs. Quai è 1,6% dapli che tar las elecziuns dal 2011. Pers avessan il pli probabel la PBD (-0,8%) e la PES (-1,2%). La pli ferma fiss restada la PPS cun 27,9% (+1,3%).

Tenor la retschertga resta la Partida populara svizra (PPS) la partida la pli gronda en il parlament cun ina cumpart da 27,9% da las vuschs. Era la successiun da las partidas tenor lur cumpart na vegn il pli probabel betg a midar. Sulettamain fissi pussaivel che la Partida verd-liberala (PVL) surpassa la Partida burgais-democratica (PBD) sin nivel naziunal.

Svilup da las vuschs entaifer las retschertgas gia fatgas.
Legenda: Svilup da las vuschs entaifer las retschertgas gia fatgas. RTR

Victura PLD

La fin da settember era en mintga cas cler che la PLD vegn a gudagnar cumparts da vuschs. Ils perscrutaders quintan cun in gudogn da 1,6% (cumpareglià cun las elecziuns 2011) e cun ina cumpart da 16,7% da las vuschs.

Perdidras PES e PBD

Da quintar cun perditas han il pli probabel la Partida ecologica svizra (PES, ils Verds), numnadamain in minus da 1,2% ad ina cumpart da 7,2% da las vuschs. Era la Partida burgais-democratica PBD sto quintar da laschar plimas cun -0,8% ad ina cumpart totala da 4,6%.

RR novitads 17:00

La retschertga

Sin incumbensa da la SRG SSR ha l'institut gfs.bern fatg la retschertga cun 2'011 intervistas tar votantas e votants cun domicil en Svizra, tranter ils 23 ed ils 30 da settember 2015. La selecziun è vegnida fatga tenor criteris represchentativs.

1'253 persunas han ditg ch'ellas veglian sa participar a las elecziuns. La toleranza tar ils resultats da las intervistas munta a +/- 2,2%.