La Conferenza svizra da las directuras e dals directurs chantunals da sanadad spetgan clers pass dal Cussegl federal. Quel duai stgaffir reglas omogenas en connex cun l’obligatori da purtar mascras, dentant er en auters secturs. Quai ha communitgà la GDK.
Concret pretendan ils chantuns in obligatori general da mascra en localitads publicas, da restrenscher occurrenzas privatas e publicas – e da recumandar da lavurar da chasa anora nua che quai è pussaivel. Restar pussaivel duai tenor la conferenza da sanadad la normala vita da famiglia e cun ils amis.
Sustegn per ils chantuns
Blers chantuns hajan gia prendì mesiras correspundentas. Perquai ch’il dumber da cas s’augmentia stedi, saja inditgà da chattar ina schliaziun sin stgalim naziunal. Ina regulaziun federala sustegness e consolidass las decisiuns chantunalas prendidas fin uss, scriva la Conferenza svizra da las directuras e dals directurs chantunals da sanadad.
