La protecziun suenter ina vaccinaziun cunter Covid-19 tegna probabel enturn in onn. Quai ha Virginie Masserey dal BAG ditg oz d'in inscunter cun las medias. Fin ussa avev'ins supponì, ch'ina vaccinaziun cumpletta fetschia in mez onn effect. Tenor la cumissiun da vaccinaziun federala protegia la vaccinaziun durant 12 mais d'ina infecziun ed anc pli ditg d'in andament grev. Las proximas emnas vegnan las ordinaziuns davart la durada da la protecziun adattadas.
Svizra ponderescha da dar vinavant vaccins
Tar ils vaccins saja la finamira anc adina da cuvrir tuttas eventualitads. Ma ins na vegnia betg a magasinar vaccins che na sajan betg admess. Ins veglia dentant er avair a disposiziun vaccins alternativs, per exempel per persunas che sajan allergicas encunter ils vaccins gia lubids. «Nus examinain er, sch'igl è pussaivel da dar giu vaccins ad auters pajais. Nus ponderain, sche nus dain vinavant trais milliuns dosas dad Astra Zeneca», uschia Masserey.
