Siglir tar il cuntegn
cuntegn

Svizra Confederaziun n'intervegn betg direct tar la SDA

Doris Leuthard na vul betg intervegnir direct tar la reducziun da plazzas da l'Agentura da novitads SDA. La Confederaziun na saja nagin acziunari da l'agentura privata.

Logo SDA.
Legenda: En futur datti dus milliuns francs ad onn per la suletta agentura da novitads da la Svizra. Keystone

Er sche la Confederaziun na veglia betg intervegnir direct tar la reducziun da 40 plazzas da l'Agentura da novitads svizra SDA, ha la responsabla da medias en Svizra Doris Leuthard accentuà l'impurtanza da la SDA. I saja deplorabel sche la producziun sa sminueschia. La SDA saja impurtanta per las medias svizras – cunzunt per pli pitschnas.

La confederaziun na saja dentant nagin acziunari da l'interpresa ed uschia na saja betg l'incumbensa dal Cussegl federal d'intervegnir en dumondas da l'interpresa. I dettia bleras interpresas svizras che hajan problems.

Betg intervegnir direct – dentant in sustegn finanzial

Leuthard fa dentant endament che la Confederaziun prevesa da sustegnair la suletta agentura da novitads svizra cun dus milliuns francs ad onn en futur. Ins veglia segirar la qualitad da rapports regiunals a lunga vista – e la SDA contribueschia a quella, uschia il departament da medias l'october 2017.

RR novitads 06:00

Structura da la SDA

La SDA è ina societad d'aczias. La gronda part dals acziunaris èn interpresas da medias, damai clients da l'agentura.