Ils Rumens èn a la testa. Tranter persunas da l’exteriur ch’èn qua pir dacurt u che vegnan en Svizra sco turists da criminalitad èn els l’onn 2014 cun dapli che 1’800 persunas sentenziadas pervi da fallaments u crims a la testa da la statistica. Quai èn dapli sentenziads che prendì ensemen tuts stadis da l’Africa dal Nord.
Suenter els suondan – adina en cifras absolutas – ils Franzos. Per gronda part èn quai probablamain Africans dal nord ch’èn daventads burgais franzos. Lura suondan ils Africans dal vest.
Africans dal vest domiciliads èn pertutgads surproporziunalmain
Guardond sin la bler pli gronda gruppa da populaziun ch’è gia pli ditg qua, pia esters cun legitimaziun B u C, mussa l’Uffizi federal da statistica nov era, quants umans ch’èn vegnids sentenziads en relaziun cun la cumpart da lur populaziun.
Da 1’000 Svizzers tranter 18 e 29 onns èn l’onn 2014 stgars 10 vegnids sentenziads. Dapli è quai tar umens giuvens da l’anteriura Jugoslavia (25 da 1’000). Tar ils Brasilians munta il dumber a 36, e tar Africans dal vest 84, adina da 1’000.
Cuntrari sa distinguan umens giuvens dals Stadis Unids da l’America u da la Gronda Britannia cun ina bassa quota da sentenzias – tschintg giadas damain ch’ils Svizzers.
Damain sentenzias per giuvenils esters
La quota da sentenzias d’esters è totalmain bler pli auta che quella dals Svizzers. Quai era gia il cas avant 10 onns, però è la tendenza anc ina giada s’accentuada. Il dumber da sentenzias d’esters è durant quest temp creschì per 44%, tar ils Svizzers be per 5%.
La buna nova percunter pertutga ils giuvenils esters cun legitimaziun B u C. Pia giuvenils che s’integreschan pass per pass en Svizra. Tar els è il dumber da sentenzias ì enavos ils ultims 10 onns, quai per 40%.
RR novitads 15:00
