Siglir tar il cuntegn

Svizra Confederaziun cun surpli d'entradas da 2,8 milliardas francs

La Confederaziun ha fatg l’onn passà in surpli da 2,8 milliardas francs. Per l’emprima giada ha la Confederaziun fatg reservas cun ina part dal surpli en il quint da finanziaziun.

chasa federala e bancnotas davanttiers
Legenda: Per l'emprima giada fa la Confederaziun reservas per equilibrar in zic il quint da finanziaziun. Keystone

Senza questas reservas che la Confederaziun ha fatg en il quint da finanziaziun, fiss resultà in surpli d'entradas da 4,8 milliardas francs. Las reservas lubeschan da gulivar il quint da finanziaziun. Ina gronda part dal surpli resulta numnadamain da la taglia anticipada ch'è realmain stada per 2 milliardas francs pli auta che schazegià en il preventiv, lura la taglia federala directa ch'ha purtà 800 milliuns francs dapli che quintà, però era cun spargnar 380 milliuns francs – tar socialesser, traffic, furmaziun e perscrutaziun.

Ussa meglieras prognosas per l'avegnir

Las prognosas dals proxims onns èn sa megliuradas grazia a quest resultat: En il plan da finanzas dals onns 2019 e 2020 prevesa la Confederaziun uss in surpli dad ina milliarda francs, l’onn suenter schizunt da 1,9 milliardas francs. Tuttina avertescha il Cussegl federal da memia bler optimissem: I na saja betg cler, co las entradas da la taglia anticipada sa sviluppian en l'avegnir. Da l'autra vart sajan era en discussiun projects che chaschunassan ulteriuras expensas da milliardas, sco per exempel la revisiun da taglia 17, l'aboliziun dal chasti da letg ubain era da stritgar la taxa da bul.

RR novitads 15:00