Tenor il comité independent saja l'iniziativa che vul abolir las taxas da radio e televisiun memia extrema. Plinavant veglia l'iniziativa stritgar il mandat da prestaziun ord la constituziun. Quai saja per il comité independent in'attatga sin la cuntrada da medias multifara en Svizra. La furmaziun libra da l'opiniun, infurmaziuns adequatas e la preschentaziun da la diversitad d'opiniuns na fiss betg pli garantida.
Er l'associaziun da las citads e Suisseculture refusan l'iniziativa
Era l'associaziun da las citads refusa l'iniziativa «No Billag». Ina purschida da radio e televisiun multifara ed independenta saja da gronda muntada per la furmaziun d'opiniun ed il spiert da cuminanza en in pajais pluriling, uschia argumentescha la suprastanza da l'associaziun da citads.
Tenor Suisseculture dovria l'art e la cultura medias independentas che na veglian betg far gudogn. Per radio e televisiun dettia gieus auditivs, essays, films e cumposiziuns. Plinavant emettian radio e televisiun concerts, teaters ed ovras litteraras.
RR novitads 17:00
