Siglir tar il cuntegn
Inhalt

Svizra Colonnas avant il Gottard

In'ulteriura unda da viadi procura per ina giada dapli per colonnas avant il tunnel da via dal Gottard ed er sin l'A13 tranter Tusaun ed il tunnel dal San Bernardino hai dà colonnas.

Colonnas avant il Gottard en direcziun sid – in maletg frequent il fanadur (15-07-2017 ad Erstfeld).
Legenda: Colonnas avant il Gottard en direcziun sid – in maletg frequent il fanadur (15-07-2017 ad Erstfeld). Keystone

Actualmain è la colonna davant il portal nord sis kilometers lunga. Il temp da spetga munta a radund in'ura. En direcziun nord tranter Quinto e Stalvedro hai colonnas da tschintg kilometers. Il temp da spetga munta a radund 50 minutas. Quai ha communitgà il servetsch da traffic Viasuisse.

Collonnas da fin 13 kilometers la sonda

La notg da venderdì sin sonda è la colonna avant il portal nord dal Gottard en direcziun sid creschida sin 12 km. Tenor il TCS ha il temp da spetga mundà a fin duas uras. Durant il di è la colonna lura creschida sin bun 13 kilometers.

Ils servetschs da vias han cusseglià sco ruta alternativa l'A13 ed il tunnel dal San Bernardino. Ma er là èn sa furmadas colonnas tranter Tusaun ed il tunnel dal San Bernardino sco er tranter Cuira sid e Reichenau. Sco ulteriura alternativa han els cusseglià la ruta tras il tunnel dal Lötschberg cun chargiar l'auto sin il tren, ubain er la A9 sur il Simplon u il Grond Son Bernard.

Motiv per la actuala unda da viada: En Svizra han il mument tut ils chantuns vacanzas da scola. En Germania cumenzan actualmain tschintg Bundesländer lur vacanzas da scola. Ed er en tschertas regiuns dals Pajais Bass cumenzan las vacanzas da stad questa fin d'emna.

RR novitads 06:00 +