Siglir tar il cuntegn

Header

cuntegn

Svizra Collecziun da Gurlitt vegn perscrutada

Il museum d'art da Berna ha creà, sco annunzià, in post da perscrutaziun che duai sa participar activamain a la perscrutaziun dals maletgs dal collecziunader Gurlitt. Manader è l'istoricher d'art svizzer Oskar Bätschmann. Ad interim n'entschaiva quel dentant anc betg cun sia lavur.

Il culp da partenza per questa lavur veglia il cussegl da fundaziun dar pir cura che la dretgira administrativa a Minca haja decidì davart la contestaziun dal testament. La cusrina da Cornelius Gurlitt, Uta Werner, aveva numnadamain contestà il testament che vul far si al museum d'art da Berna ses entir relasch.

Cornelius Gurlit è mort il matg 2014 ed aveva destinà il Museum d'art da Berna sco sulet ertavel. Sia collecziun cumpiglia passa 1600 maletgs, tranter quels ovras custaivlas da Matisse, Picasso, Renoir e Monet.

Gidieus en Svizra èn cuntent

La Federaziun svizra da las communitads israelitas SIG e la plattafurma dals Gidieus liberals da la Svizra beneventan ch'il Museum d'art a Berna ed il stadi tudestg fetschian lur perscrutaziuns davart art spoglià e ch'ins veglia turnar ils maletgs a lur possessurs legitims. Sch'ins na possia betg turnar singulas ovras d'art duain quellas - tenor cunvegna - vegnir signadas durant exposiziuns cun ina descripziun sco objects d'art spoglià. D'exposiziuns da "entartete Kunst" cun ovras ord l'ierta da Gurlitt stoppia plinavant resortir che questas ovras eran scumandadas durant il temp dals Nazis. Uschia han communitgà las duas organisaziuns.

Artitgels legids il pli savens