Siglir tar il cuntegn
Inhalt

Svizra CM 2017: Van der Bellen ha anc speranza per medaglia austriaca

Tar si'emprima visita en Svizra è il nov president austriac Alexander Van der Bellen s'inscuntrà a Berna cun la presidenta da la confederaziun Doris Leuthard. Tranter auter era il sport in tema.

Van der Bellen e Leuthard sesan vid'ina maisa.
Legenda: Caferlada presidiala: Il president da l'Austria Van der Bellen e Doris Leuthard discurran da sport, migraziun e relaziuns bilateralas. Keystone

Tar sia emprima visita en Svizra è il nov president austriac Alexander Van der Bellen s'inscuntrà a Berna cun la presidenta da la confederaziun Doris Leuthard. Omadus han ludà las relaziuns stretgas e plain confidenza tranter la Svizra e l'Austria.

Il president austriac ha era ditg, ch'el giavischia ina relaziun sco cun la Svizra era cun auters pajais vischinants. En in temp ch'i dettia uschè bler conflicts e malsegirtads saja il barat tranter dus pajais neutrals e stabils extrem impurtant.

Sport, relaziuns bilateralas e migraziun

Era il campiunadi mundial saja stà tema: «L'Austria po cuir a la Svizra mintga medaglia», ha Van der Bellen ditg envers la pressa. Ils Svizzers han fin uss dapli medaglias che l'Austria.

Ils Campiunadis mundials n'èn anc betg vargàds.
Autur: Alexander Van der BellenPresident da l'Austria

Ins haja pia anc betg pers la speranza, ha il austriac agiuntà cun in surrir.

Dasper il sport e las relaziuns bilateralas han Leuthard e Van der Bellen era discurrì davart la Gronda Britannia che banduna l'UE e la situaziun da migraziun en l'Europa.

RR novitads 16:00