Siglir tar il cuntegn
cuntegn

Svizra Citads svizras profiteschan d'immigraziun or da l'UE

L'immigraziun dals ultims onns ha effects positivs per las citads e la Svizra. Quai mussa in studi da l'Uniun da las citads svizras. Ella pretenda perquai ch'ils contracts bilaterals cun l'UE na vegnan betg mess en privel.

Pervi da l'immigraziun è il martgà d'abitaziuns tendì en bleras regiuns.
Legenda: Pervi da l'immigraziun è il martgà d'abitaziuns tendì en bleras regiuns. Keystone

Grazia a l'immigraziun saja l'economia dal 2002 fin il 2008 creschida per passa 3% pli ferm che senza la libra circulaziun da persunas. Grazia a spezialistas e spezialist da l'exteriur saja s'augmentà il nivel da qualificaziun e la productivitad. Quai haja stabilisà la conjunctura, scriva l'Uniun da las citads.

Immigrants èn integrads bain

Il champ da perscrutaziun en Svizra saja daventà pli internaziunal, quai che haja rinforzà la forza innovativa dal pajais. I na dettia nagins indizis che lavurers indigens vegnian stgatschads. Però tar ils aut qualifitgads ha l’immigraziun franà il nivel da pajas.

Plinavant concluda il studi ch’ils immigrants sajan bain integrads. Els sajan giuvens, cun buna scolaziun e savens er pronts da s’engaschar en uniuns.

RR novitads 12:00