Siglir tar il cuntegn
Inhalt

Svizra Ciclists ed attempadas èn spezialmain periclitads

Il 2017 èn 230 persunas mortas tar accidents sin via, quai èn 14 dapli che l'onn avant.

Accident tranter in velo ed in auto. Il velo e rut per terra e l'auto ha in donn ed è pli davostiers.
Legenda: 230 persunas èn mortas l'onn passà tar accidents sin via. Keystone

Tar accidents sin vias svizras èn l’onn passà 230 persunas mortas. Tenor l’Uffizi federal da vias ASTRA èn quai 14 dapli ch'il 2016. Cunzunt tar motociclists e velocipedists hai dà dapli accidents mortals sco er tar persunas attempadas sin strivlas melnas. Cumpareglià cun il 2013, cura che 269 persunas eran anc mortas tar accidents da traffic, datti tuttina mintg'onn plitost pli pauc accidents mortals.

Blers accidents il schaner 2017

Sco passagiers d'auto èn l'onn passà 78 persunas sa disgraziadas mortalmain, quai èn trais dapli ch'il 2016. Fermamain blessads èn vegnidas 781 persunas ch'eran en autos da persunas – 91 pli paucas che l'onn avant. Remartgablamain blers morts e blessads en autos da persunas hai dà il schaner dal 2017, numnadamain 12 morts e 92 ferm blessads. Sco raschun per ils accidents numna l'ASTRA, ch'ils pli blers n'avevan betg adattà il tempo a las relaziuns da las vias.

Surtut peduns sur 65 periclitads

Il dumber total d’accidents mortals tar peduns è sa sbassà levamain. Tuttina èn dapli peduns morts tar accidents sin strivla smelnas che l’onn avant. Da las 20 persunas ch'èn mortas tar accidents sin passadis da peduns eran trais quarts sur 65 onns.

Dapli accidents cun vehichels a duas rodas

Dapli accidents mortals hai surtut dà pervi da dapli accidents cun vehichels a duas rodas. Il 2017 èn 51 motociclists morts sin via, quai èn 8 dapli che l'onn avant. Il dumber da motociclists ch'èn sa blassads fermamain tar accidents è creschì per 48 sin totalmain 1047 persunas.

Cun e-bike èn 7 persunas stadas involvidas en in accident e mortas (2016: 9), il dumber da fermamain blessads è però creschì da 201 sin 224. Nagina detensiun datti tar ils accidents cun velocipedists: Il 2017 èn 30 velocipedists morts tar accidents da traffic, quai èn 6 dapli che l'onn avant. Il dumber d'accidents cun grevas blessuras ha dentant pudì vegnir sbassà per 4% sin 818.

RR novitads 14:00