Siglir tar il cuntegn
Inhalt

Svizra Chombra gronda vul limita pli auta per ina annunzia tar la KESB

Il Cussegl naziunal resta tar sia decisiun: La limita per in'annunzia tar la KESB duai vegnir auzada. In'annunzia duai mo dar sch'i dettia in suspect concret ch'in uffant vegnia maltractà.

Educatura cun uffants pitschens.
Legenda: Tut quels che lavuran regularmain cun uffants duain esser sfurzads da far in'annunzia tar la KESB. (maletg simbolic) Keystone

Tar quella decisiun è il Cussegl naziunal vegnì cun 96 tar 85 vuschs. Ils aderents pledeschan ch'ins veglia evitar ch'i dettia annunzias nunnecessarias. Ussa vegn il tema anc ina giada avant il Cussegl dals chantuns. Là è il tenor general da betg auzar memia fitg la limita tenor il motto «Pli gugent ina giada memia bler che ina giada memia pauc».

Reagir avant che l'integritad è gia periclitada

Concret vul il Cussegl naziunal ch'ins haja il dretg da far in'annunzia tar l'autoritad per la protecziun da l'uffant e da creschids (KESB), sch'i dettia indizis concrets che l'integritad fisica, psichica u sexuala da l'uffant saja periclitada. Sche l'integritad saja periclitada «seriusamain», hajan ins perfin l'obligaziun da far in'annunzia .

Il Cussegl dals chantuns vul dentant ina limita pli bassa: ins duai gia avair il dretg sco era l'obligaziun da far in'annunzia sche l'integritad paria periclitada – e betg pir cura ch'ella saja senza dubi periclitada. Sch'il Cussegl dals chantuns resta tar quella pretensiun vegn ina conferenza da cunvegna a decider.

Tar il punct central èn ils cussegls d'accord

Il punct central dal project da votaziun davart da la protecziun d'uffants è dentant l'extensiun da l'obligaziun da far in'annunzia. En quest punct èn las duas chombras gia vegnidas perina: en futur duain betg mo scolasts e lavurants socials avair l'obligaziun da far in'annunzia, mabain era lavurants da canortas e scolasts da sport. L'obligaziun vala per mintga persuna che lavura regularmain cun uffants. Ella duai cunzunt proteger uffants pli pitschens ch'èn betg en contact cun scolasts ni persunas uffizialas.

RR novitads 12:00

Uffants maltractads

En ospitals svizzers vegnan tractads mintg’onn sur 1'400 uffants pervi da las consequenzas da maltractament. La cifra zuppada vegn dentant stimada anc bler pli auta. Bunamain la mesadad da las unfrendas èn uffants sut ses onns.