Siglir tar il cuntegn
Inhalt

Svizra Chaus cotschens tar Green Cross

L’organisaziun d’ambient Green Cross International è quasi bancrut e na po betg pli pajar ils quints. La culpa per il bancrut dat l’organisaziun a la secziun svizra sut il timun dal cusseglier naziunal Martin Bäumle dals verd liberals.

purtret dal cusseglier naziunal Martin Bäumle
Legenda: Martin Bäumle pretenda dapli transparenza en l'organisaziun da Green Cross. Keystone

Ord protest ha l’ultim president da l’uniun sovietica Michael Gorbatschow, ch’era in dals fundaturs da l’organisaziun, demissiunà. En ina brev ch'è stada publitgada curtamain sin la pagina d'internet da Green Cross ha el motivà sia retratga cun «tendenzas destructivas», cun «intrigas» e «sabotaschas».

Las renfatschas èn adressadas a Green Cross Svizra ed il president da l'organisaziun Martin Bäumle. Il cusseglier naziunal da la partida verdliberala ha prendì posiziun: «I dettia differenzas davart la situaziun. I saja però fitg cler, che quai saja da discutar internamain. Il mument na dastga e na veglia el betg dar infurmaziuns.»

Bäumle serra la spina finanziala

Er Green Cross International na dat naginas infurmaziuns, turna dentant a rebatter sin sia pagina d'internet. Ella renfatscha che la secziun svizra n'haja betg pajà sias contribuziuns, perquai sa chattia l'uniun tetgala internaziunala en ina greva crisa finanziala.

Sistì pajaments pervi da intransparenza

Sin questas renfatschas reagescha Bäumle cun ina communicaziun sin sia pagina d'internet. La Svizra veglia pajar quests daners pir cura che l'uniun tetgala fetschia transparent las finanzas.

RR novitads 12:00