Vinavant prevesa quest plan d'acziun che giuvenils dastgian gia votar cun 14 onns, damai che quels sajan pertutgads particularmain da la midada dal clima.
Il catalog ch'il moviment ha preschentà è vegnì elavurà ensemen cun expertas ed experts da la politica, da l'economia e da la scienza. En total propona el 138 mesiras. Il motiv per quest plan è tenor il moviment la passivitad da las autoritads a la politica. Las instituziuns n'hajan nagin plan adequat per far frunt a la crisa dal clima.
Entras il plan veglian ins mussar, ch'in auter mund fiss pussibel. El cumpiglia las pli impurtantas mesiras ecologicas e socialas per transfurmar la societad e l'economia. En il mument possian ins anc far questa midada, ins na dastgia dentant betg spetgar memia ditg.
