Siglir tar il cuntegn
cuntegn

Svizra Chattar chemicalias en noss corps

Nus faschain la duscha cun schampo, lavain nossa vestgadira cun pulvra da lavar ni bavain da tuttas sorts bavrondas or da buttiglias da plastic. Tge influenza che quai ha sin noss corp e sin nossa sanadad vul la Confederaziun chattar ora cun in studi a lunga vista.

Chemicalias en noss corps.
Legenda: Chemicalias en noss corps. BAG

En dus pass vul l'Uffizi federala da sanadad analisar la sanadad da las Svizras ed dals Svizzers. En in emprim pass datti in studi da pilot. Per quel vegnan ramassadas datas da 1'000 persunas da la regiun Losanna e Basilea. Durant tschintg onns ston las persunas dar giu provas da sang ed urin, e protocollar lur mintgadi.

Tant il studi da pilot sco era il studi extendì che suonda sa basan sin datas d'umens e da dunnas da tut las vegliadetgnas, dentant betg d'uffants. Plinavant duain las persunas avair differentas cundiziuns da viver sco per exempel: viver en citad u en la champagna ubain esser ritg u pover.

Cun las experientschas dal studi da pilot vul'ins adattar ed extender il studi sin 100'000 persunas en l’entira Svizra. Cun ils resultats dal studi na vul ins betg sulet chattar ora tge che las chemicalias fan cun il corp, mabain era perscrutar malsognas sco per exempel diabetes. Quant che l'entir project custa n'è anc betg cler. Il studi da pilot però vegn a custar var in milliun francs.

Blers pajais en l’Europa ramassan gia dapi divers onns talas datas. La Svizra possia profitar da la savida dals vischins ed uschè far il studi pli effizient, ha communitgà l’Uffizi federal da sanadad.

RR actualitad 17:00

human biomonitoring

human biomonitoring

Cun il human biomonitoring vegn surveglià sche e quant che la populaziun è influenzada da substanzas nuschaivlas. Sin basa dals resultats vulan ins adattar las mesiras da sanadad.