Siglir tar il cuntegn

Svizra Chastis na duain betg dastgar vegnir tratgs giu da la taglia

Las bancas na duain betg dastgar trair giu da la taglia ils chastis ch’ellas ston pajar. En quest punct èn quasi tuttas partidas da l’opiniun dal Cussegl federal. La PPS e la PLD pretendan dentant che quai na valia betg automaticamain, cunquai ch'ils chastis sajan savens er motivads politicamain.

Paradeplatz a Turitg.
Legenda: Il tema era vegnì actual il 2014 en connex cun il chastì da milliardas per la Credit Suisse en la dispita da taglia cun ils Stadis Unids. Keystone

Quai resulta da la consultaziun davart la nova lescha da taglia. La revisiun preveda tranter auter ch'interpresas na dastgan betg pli trair giu da la taglia sancziuns finanzialas, sco per exempel ils chastis da milliuns en la dispita da taglia cun ils Stadis Unids. La revisiun sa basa sin ina moziun dal cusseglier dals chantuns da la BDP Werner Luginbühl.

Basa legala manca

La confederaziun na lubescha gia oz betg da trair giu da la taglia chastis e sancziuns cun caracter da chastì. Ina basa legala manca però. Vitiers vegn ch’ils chantuns han differentas praticas. Il tema era vegnì actual il 2014 en connex cun il chastì da milliardas per la Credit Suisse en la dispita da taglia cun ils Stadis Unids.

RR novitads 18:00