Siglir tar il cuntegn

Svizra Chasti pervi da memia paucas plazzas d'asil

32 vischnancas lucernaisas han da pajar in chasti perquai ch’ellas n’han betg stgaffì las plazzas d'asil pretendidas dal chantun.

In requirent d'asil anonimisà cun ina broschura dal chantun Luzerna.
Legenda: Memia paucas plazzas per els - la clav da repartiziun da la regenza na para betg da plaschair a tut las vischnancas lucernaisas. Keystone

Las 32 vischnancas ston pajar en tut 170-milli francs multas al chantun. Quests daners survegnan lura las vischnancas che mettan a disposiziun dapli plazs che quai ch'ellas stuessan.

En pli han 19 da 49 vischnancas ch’avessan stuì dar albiert a requirents d’asil betg accumplì lur duair l’emprima mesadad da quest onn. Ellas vegnan a stuair far quint cun ulteriurs chastis.

Sco quai ch'il chantun Lucerna scriva vul la regenza vinavant duvrar la clav da repartiziun da 12 requirents d'asil sin 1'000 abitants. Quella clav vegn duvrada dapi il cumenzament da quest onn.

RR novitads 12:00