Svizra - Chaschiel svizzer è puspè dumandà en l'UE
Ils exports da chaschiel svizzer en l'Uniun europeica èn sa revegnids en l'emprima mesadad da l'onn. Tenor l'administraziun federala da duana èn ils exports s'augmentads per 2,4%. En las duas mesadads da l'onn passà eran ils exports da chaschiel sa reducids mintgamai per 9%.
L'UE è il pli impurtant martgà per chaschiel svizzer. 80% dals exports van en quest spazi. Restà stabil è il pretsch dals exports. En media vegn exportà chaschiel svizzer per 8.35 francs il kilo.
Era s'augmentads èn ils imports da chaschiel. Dapi il schaner èn vegnids importads 6,6% dapli chaschiel cumpareglià cun l'emprim mez onn dal 2015.
