Siglir tar il cuntegn
Inhalt

Svizra Charta cotschna per Blatter

Ils dus concerns americans Coca Cola e McDonald's pretendan ch'il president da la FIFA, Sepp Blatter sa retiria per immediat, suenter che las autoritads svizras han instradà inquisiziuns cunter il president da la Federaziun internaziunala da ballape.

Il president da la FIFA Sepp Blatter.
Legenda: Ils advocats da Sepp Blatter ha laschà drizzar ora ch'el na vegnia betg a sa retrair anticipadamain. Keystone

La reputaziun e l'image da la FIFA pateschia cun mintga di, communitgescha Coca Cola, che tutga tar ils sponsurs principals. La FIFA dovria urgentamain ina refurma totala che vegnia prendida enta maun d'ina vart independenta.

Ils advocats da Blatter han laschà drizzar ora ch'el na vegnia betg a sa retrair anticipadamain malgrà las pretaisas dals sponsurs principals.

Adidas pretenda refurmas, dentant nagina retratga immediata

Adidas na pretenda betg ch'il president da la FIFA Sepp Blatter sa retiria per immediat. Tenor il pledader dad Adidas na gida quai betg a cuntanscher la finamira. Tar la FIFA stoppia quai dar midaments fundamentals en il senn dal sport. Per questa raschun stoppian ins era cuntinuar il process da refurmas e quai svelt ed a moda transparenta.

RR novitads 06:00/12:00