Siglir tar il cuntegn
Inhalt

Svizra Charplinas per binaris

Las trais interpresas da viafier, la SBB la BLS e la SOB, na vegnan betg perina co reparter da nov las lingias grondas da viafier svizras.

In tren da la SOB en staziun.
Legenda: Dispitas en il traffic da tren: Tant la Südostbahn sco era la BLS han interess vi da lingias che la SBB maina actualmain. Keystone

Las viafiers privatas BLS ed SOB vulan manar sezzas tschertas lingias grondas che la SBB maina actualmain. Las discussiuns cun la SBB n'èn dentant betg gartegiadas.

Tar in inscunter dals auts da questas interpresas da viafier saja sa mussà ch'ina schliaziun en enclegientscha na saja betg pussaivla, communitgescha l'uffizi federal da traffic. I na saja pervia da quai betg raschunaivel da cuntinuar las discussiuns. Uss sto l'uffizi sez decider fin la fin da l'onn.

SBB argumentescha cun dapli custs

Il december 2017 scroda numnadamain ina gronda part da las concessiuns per las lingias grondas da viafier. Dapi atun 2016 eran las partidas en discussiun.

La BLS è da l'opiniun ch'il traffic public possia vegnir pli attractiv e pli cumpetitiv sche las viafiers privatas surprendan sez tschertas lingias. La SBB argumentescha ch'ils custs da sistem s’augmentassan per 20 fin 30 milliuns francs per onn. Quests custs stuessan tenor SBB vegni surpiglià da la confederaziun e dals clients.

RR novitads 14:00