En general vesa quai or bain: Dals 23 chantuns ch’han gia preschentà lur quints per il 2015 nodan be quatter in minus, numnadamain Genevra, Sursilvania, Soloturn e Zug. Totalmain datti in surpli da bunamain 1,2 milliardas francs visavi deficits da radund 120 milliuns.
Tuttina: Salvà ha la bilantscha da la Banca naziunala che ha fatg in gudogn da record. Uschia ha ella repartì 1,3 milliardas francs sin ils chantuns, quai ch’è dubel uschè bler sco usità.
Quitads finanzials per chantuns restan vinavant
Ma betg mo ils pajaments da la Banca naziunala han procurà per blers quints positivs. In'ulteriura raschun per il bun resultat èn ils programs da spargn dals chantuns. Ed er l’augment d’entradas da taglia han gì in effect positiv per blers chantuns. Dapli taglia che budgetà han gudagnà ils chantuns Basilea-Citad, Sviz, Turgovia, Son Gagl e Friburg.
Ils quitads finanzials dals chantuns n'èn dentant betg vegnids pli pitschens, dian ils directurs da finanzas. Raschuns sajan las consequenzas intschertas dal ferm franc e da la refurma da las taglias d'interpresas.
Revista dals budgets e quints chantunals per il 2015
Chantun | Budget 2015 (en miu. francs) | Quint 2015 (en miu. francs) |
---|---|---|
AG | +1,6 | +0,4 |
AI | -2,3 | +4,7 |
AR | +12,3 | +11,8 |
BE | +124 | +170 |
BL | -30 | anc betg publitgà |
BS | +37 | +432,4 |
FR | +0,2 | +24 |
GE | +13,7 * | -21 |
GL | -4,9 | +2,4 |
GR | -55 | +17 |
JU | -4,1 | +1 |
LU | -40,9 | +23,3 |
NE | -11,8 | anc betg publitgà |
NW | -12,4 | +0,6 |
OW | -8 | -2,5 |
SG | -25,2 | +154,5 |
SH | -10 | +4,9 |
SO | -73,7 | -8,6 ** |
SZ | -66 | +10 |
TG | -3,2 | +7,8 |
TI | -112,2 | anc betg publitgà |
UR | +5,4 | +21,1 |
VD | +26 | +194 |
VS | -7 | +95,7 |
ZG | -129,2 | -87,9 |
ZH | +27 | +18 |
- * Genevra ha currigì il budget l'avust 2015, da +14 miu. francs sin -200 miu. francs.
- ** Il deficit munta a 1,3 mia. francs, quai pervi da la finanziaziun restanta da la cassa da pensiun. Il resultat operativ munta a -8,8 miu. francs.
RR novitads 12:00