Siglir tar il cuntegn

Svizra Chantuns duain decider sez davart lur sistem d’eleger

Il Cussegl dals chantuns vul laschar maun liber als chantuns tar la dumonda co els vulan eleger lur autoritads. La Chombra pitschna vul ch'il tribunal federal na possia far naginas prescripziuns pli.

Um pli passà che va a vuschar.
Legenda: En il Grischun vegn vuschà tenor il sistem da maiorz. Keystone

Ils ultims onns ha il tribunal federal adina puspè prescrit als chantuns da midar lur sistem d'eleger, perquai ch'el vesa quel sco betg fair. Sinaquai han ils chantuns Zug ed Uri reagì cun ina iniziativa dals chantuns.

Ussa duai vegnir scrit en la Constituziun ch'ils chantuns èn libers da decider co els vulan eleger. Di er il Cussegl naziunal gea a l'iniziativa sto il pievel svizzer decider davart las proceduras d'eleger.

Il tribunal federal s'occupescha il mument er cun in plant cunter il sistem da vuschar da maiorz dal Grischun.

Maiorz e proporz - tge è la differenza?

Tar il sistem da maiorz vegn elegì il candidat ch'ha survegnì las bleras vuschs. Ils candidats sa la schan eleger sco persunas singulas, ellas vegnan savens però nominadas e sustegnidas dad ina partida.

Il Cussegl naziunal vegn elegì tenor il sistem da proporz. Qua na vegnan betg ils candidats directs elegids, mabain glistas (savens partidas). L'avantatg da quest sistem è ch'er las partidas pitschnas pon vegnir elegidas en il parlament.

RR novitads 12:00