Siglir tar il cuntegn
Inhalt

Svizra Chantun Berna duai sa retrair da las BKW

Quai è la proposta radicala da la scheffa da las Ovras Electricas Bernaisas BKW, Suzanne Thoma, en in’intervista cun la gasetta «Le Matin Dimanche».

Portrait.
Legenda: Suzanne Thoma, la scheffa da las BKW, vul tegnair quint a las pretaisas dals acziunaris. Keystone

La scheffa da las BKW sa saja conscienta dal fatg, che questa idea na saja betg bainvesida dapertut. Suzanne Thoma propona numnadamain, ch’il chantun Berna sa retiria da l’acziunariat da las BKW.

Betg sa privar dal squitsch d'interpresa

Las BKW saja in’interpresa cotada a la bursa e per radund la mesadad dals acziunaris saja la rentabilitad il pli impurtant. I saja tant difficil sco er malsaun, da sa privar da quest squitsch d’interpresa.

Cun quai ch’intgins controlleschian il chapital, hajan els l’impressiun da pudair influenzar lur strategia, vegn citada Suzanne Thoma. Quai saja dentant ina illusiun.

Nova lescha davart la participaziun a las BKW

Il chantun Berna è cun radund 52% da las aczias l’acziunari principal da las BKW. Il november vegn il Cussegl grond Bernais probablamain a discutar ina lescha da participaziun nova pertutgant la BKW. En la fasa da consultaziun è er vegnì discutà da spartir si las BKW.