Siglir tar il cuntegn
Inhalt

Svizra Chancelier federal defenda e-voting

La votaziun electronica è segira. Ils ristgs sajan giustifitgabels. Quai ha ditg il chancelier federal Walter Thurnherr en in’intervista cun la «NZZ».

E-voting.
Legenda: La Svizra vul introducir in sistem che constatescha eventualas manipulaziuns. Keystone

Enfin uss haja en Svizra da 200 emprovas en connex cun la moda da votar electronica. Ed i n'haja dà nagins indizis, ch'insatge n'haja betg funcziunà a moda correcta, ha ditg il chancelier federal Walter Thurnherr.

Las famas ch'il sistem da votar da Genevra saja vegnì fatg il hacken, na constettian betg. Tuttina fetschian ellas malsegiras la populaziun, manegia il responsabel per il sistem da votar online en Svizra. Ed er las lingias grossas en connex cun emprovas da manipulaziun da votaziuns en l'exteriur u en connex cun scandals tar Facebook hajan chaschunà intschertezzas. Quests schabetgs n'hajan dentant da far nagut cun la moda votar, mabain hajan in'influenza sin la furmaziun da l'opiniun. La Svizra veglia introducir in sistem, che fa sez cas dad eventualas manipulaziuns – in sistem pussibel da verifitgar cumplettamain. En in tal sistem haja el dapli fidanza che en mintga auter sistem digital ch'el dovria sin ses computer u telefonin.

Sistem da test tar sistem reglà

Plinavant vul la Confederaziun elavurar in project da lescha per midar la fasa da tests en ils chantuns en in manaschi reglà. Uschia stuessan ils chantuns betg dumandar lubientscha per votar online per mintga votaziun.

Tar las votaziuns ils 10 da zercladur vegnan probablamain radund 114'000 persunas cun dretg da votar che vivan en Svizra a pudair votar a moda electronica. Vitiers vegnan 79'000 persunas cun dretg da votar che vivan en l'exteriur.

RR novitads 09:00