Dapi l'avust 2017 èn, tenor indicaziuns da la UNO, radund 780'000 persunas da la minoritad muslima dals Rohingya fugì da lur patria en il nord dal Myanmar. Ils fugitivs han rapportà da violenza cun armas e vitgs ch'èn ars giu en lur patria.
Blers dals Rohingya èn blessads u traumatisads fermamain, e bleras famiglias èn vegnidas stgarpadas dapart. La maioritad dad els è arrivada suenter la fugia difficila en champs da fugitivs fullanads en il Bangladesch. La mancanza d'aua da baiver e da mangiativas è enorma, e la gronda part dals fugitivs viva senza suttetg ed indrizs sanitars.
Plievgia po chaschunar catastrofa en la catastrofa
La plievgia dal monsun po chaschunar en il champ da fugitivs a Cox Bazar en il Bangladesch – in dals pli gronds champs da fugitivs dal mund – ina catastrofa en la catastrofa. La plievgia po inundar vias e baraccas. Entirs quartiers pon vegnir isolads, uschia ch'ils fugitivs pertutgads n'han betg pli access al provediment medicinal ed al post da nutriment.
«Vitiers vegn che las collinas sezzas vegnan ad esser be pli glitta, cunquai ch'ins ha runcà ellas per avair laina da brisch per cuschinar», di Barbara Dietrich da la Helvetas ch'è gist turnada dal champ, nua ch'ella ha coordinà in project da cartografar il champ.
Privel da colera
E Barbara Dietrich agiuntescha anc in ulteriur problem: las veglias latrinas che consistan be dad ina rusna en la terra, possian ir suror e las fecalias uschia sa maschadar cun l'aua da baiver. Quai possia lura chaschunar colera ubain autras malsognas da diarrea.
Di da collecta ils 23 da matg
Ils 23 da matg ha la Chadaina da Fortuna organisà ensemen cun la SRG SSR in di naziunal da collecta. Ina da las centralas è vegnida endrizzada tar Radiotelevisiun Svizra Rumantscha (RTR) a Cuira.
Fin mesanotg èn 102'974 francs vegnids rimnads sur la centrala a Curia.
Uschia gida Vossa donaziun
Las organisaziuns d'agid associadas a la Chadaina da Fortuna vegnan a realisar cun las donaziuns projects ch'èn adattads als basegns dals fugitivs:
- Ellas repartan mangiativas ed aua da baiver netta
- Ellas repartan tendas ed artitgels da mintgadi
- Ellas tractan malsauns e blessads
- Ellas protegian uffants dad explotaziun ed abus e gidan uffants e creschids da surmuntar lur traumas
- Ellas s'occupan d'uffants ch'èn vegnids separads da lur geniturs sin la fugia
- Ellas dattan daners als fugitivs, per ch'els possian cumprar sez il pli necessari
Gia ramassà passa 4,5 milliuns francs
Enfin ils 20 da matg ha la Chadaina da Fortuna ramassà pli che 4,5 milliuns francs per ils Rohingya e pudì sustegnair cun quels daners 12 projects ed uschia bunamain 220'000 persunas.
RR actualitad 06:00++
