Siglir tar il cuntegn

Header

cuntegn

Chadaina da Fortuna Dunnas stattan en il center da la 250avla rimnada

Dals 12 fin ils 19 da settember rimna la Chadaina da Fortuna per la 250avla giada daners per persunas en miseria. En 73 onns ha la fundaziun dumagnà da rimnar radund 1,8 milliardas francs donaziuns per passa 4'000 projects d'organisaziuns partenarias en ed ordaifer il pajais.

Questa rimnada da giubileum fa la Chadaina da Fortuna en il num da las dunnas che pateschan da crisas emblidadas. Ellas pateschan d'in enorm squitsch per tegnair ensemen la famiglia. Plinavant èn ellas messas ora a gronds privels sco mulestas sexualas, violaziun, commerzi cun umans u er violenza famigliara.

Per far donaziuns:

Per far donaziuns:

Dar pudais vus:

La rimnada da questa giada sa concentrescha sur tut sin projects che mettan dunnas sco acturas da l'agid umanitar en il center. Uschia per exempel per reconstruir la basa da viver, per generar ed administrar la paja per la scolaziun sco era per lur dretgs.

Actualmain datti 26 crisas emblidadas

Sin la charta èn da vesair 26 pajais nua che crisas emblidadas regian. Tar quest giubileum vul la Chadaina da Fortuna sa concentrar sin questas crisas che na vegnan betg pli menziunadas uschè savens en las medias. Dasperas duain er dunnas en situaziuns d'urgenza en Svizra vegnir sustegnidas en lur cumbat per l'existenza.

Dunnas en crisas emblidadas

Saja quai en in champ da fugitivs u en il Jemen ch'è periclità d'attatgas da bumbas or da l'aria, dunnas vegnan savens discriminadas pli ferm en situaziuns da crisas.

Il pli savens èsi las dunnas che pateschan pli ferm da talas crisas – sin basa fisica, psicologica, sociala u economica.
Autur: Ertharin CousinDirectura dal Program alimentar mundial da l'ONU

Malauras tutgan savens pli ferm las dunnas. Tar tsunamis per exempel sajan dapli dunnas tranter las unfrendas. Las normas culturalas na laschan savens betg tiers che dunnas emprendan da nudar. L'agid umanitar va plinavant er savens da quai ora che umens e dunnas fan las medemas experientschas en temps da crisas e ch'els hajan ils medems basegns.

Perdita da l'independenza, malsegirezza e povradad

En blers pajais èn las dunnas quellas ch'èn pli pertutgadas da midadas climaticas.

En l'Asia per exempel èn sis da 10 dunnas puras e tuttina ha l'agid umanitar ditg ignorà ellas sco producentas da nutriment.
Autur: Princessa Haya da JordaniaAmbassadura per la pasch da l'ONU

Savens surpiglian ellas er lavurs betg pajadas per la famiglia, sco per exempel la tgira da malsauns, ir per laina u aua. En il cas da crisa perdan bleras dunnas perquai lur independenza. Ellas cumenzan a far lavurs en la sparta informala – senza protecziun dal dretg e cun la ristga da vegnir explotadas.

Mortalitad da mammas

Bleras dunnas e giuvnas ristgan lur vita sch'ellas èn en speranza durant in temp da crisa, sin la fugia, en champs da fugitivs u suenter catastrofas natiralas – er sch'ellas survivessan sut circumstanzas normalas.

Passa la mesadad dals mortoris pervi da cumplicaziuns da gravidanza e pervi da la maternitad capitan en regiuns instabilas, durant crisas umanitaras.
Organisaziun mundiala da la sanadad WHO

In collaps dals sistems da sanadad pervi da conflicts e l'access manglus al provediment da sanadad custan mintga di la vita a tschients dunnas giuvnas. Cumplicaziuns da gravidanza tutgan tar ina da las raschuns principalas che giuvnas moran en pajais da svilup. Tar giuvnas sut 15 onns è il ristg anc pli grond.

Dunnas sco acturas da la midada

Adina dapli dunnas mobiliseschan ed auzan lur vusch cunter violenza e discriminaziun. Ellas pretendan egualitad ch'è da principi in dretg uman. Sco acturas da la midada giogan dunnas en lur cuminanzas in'impurtanta rolla damai ch'ellas s'engaschan ferm per schliar las crisas.

Dunnas africanas èn per exempel ina pitga principala per l'economia da subsistenza. Lur lavur mantegna la vita en famiglias e cuminanzas, ha declerà Salvano Briceno, directur dal program da strategia da l'ONU.

Partent da quest'observaziun han experts constatà ch'in pass impurtant per furmar ina ferma cuminanza è da promover las capacitads da las dunnas, per ch'ellas possian flaivlentar e dumagnar meglier catastrofas natiralas.
Autur: Salvano BricenoDirectur dal program da strategia da l'ONU

Catastrofas natiralas pon er esser ina schanza per minimar l'inegualitad tranter um e dunna. Pregiudizis envers dunnas pon vegnir eliminads entras programs che cumpiglian las dunnas sco partida eguala per puspè bajegiar si la nova vita.

RR Chadaina da Fortuna