Il Cussegl naziunal aveva approvà ina moziun da Christian Lohr cusseglier naziunal dal chantun Turgovia. Lez aveva crititgà ch’il center da sport da naiv previs a Lai na tanschia betg per sportists ord la Svizra franzosa, or dal Vallais ed ord autras regiuns. Il Cussegl dals chantuns ha uss refusà questa moziun cun l’argument ch’ina tala pretaisa saja finanzialmain nunrealistica.
Decisiun ils proxims mais
Perfin la realisaziun d’in center naziunal da sport da naiv è dispitaivla. En la consultaziun eran Swiss Olympic e las partidas burgaisas s’exprimidas cleramain cunter. Il minister da sport Guy Parmelin ha annunzià ch’il Cussegl federal vegnia anc a decider l’emprima mesadad da l’onn, sch’in tal center vegnia realisà e sche quai succedia a Lai.
RR Novitads 11:00