Stgars 42'900 persunas han retratg il 2019 da nov ina renta da vegliadetgna ord la segunda pitga. Quai communitgescha l'Uffizi federal da statistica. La renta da median or da la cassa da pensiun haja muntà per ina dunna a 1’160 francs per mais, per in um percunter a 2’144 francs. Renta da median vul dir, che la mesadad da las persunas han retratg ina renta pli auta e l'autra mesadad ina renta pli bassa.
Passa 40% da las prestaziuns retratgas anticipadamain
Il 2019 han radund 55'700 persunas retratg chapital ord il provediment professiunal da vegliadetgna. L'import median per talas retratgas da chapital ha muntà tar ils umens a 142'900 francs e tar las dunnas a 59'000 francs. Tut en tut èn passa 40% da las prestaziuns ord la cassa da pensiun vegnidas pajadas or avant che la persuna aveva cuntanschì la vegliadetgna da renta regulara.
Differentas biografias e carrieras
La raschun per questas differenzas tranter umens e dunnas sajan en emprima lingia las carrieras differentas dad um e dunna. Uschia interrumpian dunnas pli savens lur activitad da gudogn ed ellas lavurian pli savens parzialmain – omadus per motivs famigliars. Ultra da quai mainian er las differenzas da paja tranter um e dunna tar ina differenza tar las prestaziuns da las cassas da pensiun.
