Siglir tar il cuntegn
Inhalt

Svizra Caritas crititgescha reducziun da las prestaziuns per agid social

Betg mo la statistica per agid social mussa che la ristga per povradad crescha. Era il dumber da persunas ch'han pers il dretg da daners da dischoccupaziun ha cuntanschì in nov nivel maximal.

Maletg simbolic cun scret per tudestg
Legenda: Dapi 10 onns n'hai betg da tantas persunas ch'han pers il dretg da daners da dischoccupaziun. Keystone

Il 2016 han en media passa 3'300 persunas pers mintga mais lur dretg da retrair sustegniment da dischoccupads. Sur l'entir onn han pia passa 40'000 persunas pers quest dretg. Quellas cifras ha la Caritas preschentà en ses almanac da l'onn 2018.

Reintegrar saja grev

Tenor la Caritas saja cunzunt grev da reintegrar persunas che n'han betg pli il dretg da daners da dischoccupads. A la plipart restia be d'ir tar l'Uffizi dal servetsch social. Plinavant na retirian betg tuttas persunas cun dretg a prestaziuns socialas era per propi sustegn finanzial. In quart desistia da retrair sustegn dal stadi.

Cumbat da minimar agid social

La Caritas pretenda da la Confederaziun da surprender dapli responsabladad e da cumbatter cunter la povradad sin plaun federal. Quai cunquai ch'i dettia tenor la Caritas vairamain in cumbat da minimar l'agid social tar ils chantuns. Uschia haja il chantun da Berna sutpassà las directivas da la lescha d'agid social. Er ils chantuns Argovia, Soloturn, Basilea-Champagna veglian minimar l'agid social.

RR novitads 14:00