Siglir tar il cuntegn

Header

Navigaziun

Cardinal Gilberto Agustoni: naschì ils 26.07.1922 - mort ils 13.01.2017.
Legenda: Cardinal Gilberto Agustoni: naschì ils 26.07.1922 - mort ils 13.01.2017. Keystone
cuntegn

Svizra Cardinal Gilberto Agustoni è mort

Il cardinal svizzer Gilberto Agustoni è mort cun 94 onns a Roma. Quai ha confermà Il pledader da la conferenza dals uvestgs svizzers, Walter Müller.

Il Papa Gion Paul ils dus aveva nominà Agustoni l'onn 1994 sco pli aut derschader ecclesiastic en il Vatican.

Gilberto Agustoni è naschì ils 26 da fanadur 1922 a Schaffusa. Suenter la scola elementara a Schaffusa ha el absolvì a Lugano il seminari da spirituals. Suenter la matura ha Agustoni studegià teologia a Roma e Friburg ed ha terminà ses studi cun far il doctorat.

Ils 20 da fanadur 1946 ha el obtegnì l’ordinaziun sacerdotala. Suenter dus onns temp d’uffizi a Lugano sco assistent da ‘l’Azione Cattolica’, è Agustoni vegnì elegì sco secretari da cardinal Alfredo Ottaviani a Roma.

Dapi l’avrigl 1992 è Agustoni pro-prefect da la signatura apostolica, la pli auta dretgira catolica per dretg canonic. Cun sia nominaziun sco cordinal era el er gist vegnì nominà sco prefect da questa instituziun.

Suenter la mort da Gilberto Agustoni dat quai be pli dus cardinals svizzers: Kurt Koch e Henri Schwery.

RR actualitad 14:00