Siglir tar il cuntegn

Svizra «Bus alpin» ha transportà 70'000 passagiers

La stad passada ha il Bus alpin transportà prest duas giadas tants passagiers sco l'onn avant, numnadamain radund 70'000. Sco l'uniun communitgescha, saja quai tranter auter d'engraziar al fatg che la purschida saja vegnida extendida.

Bus fa purla durant charrar.
Legenda: Il Bus alpin sin l'Alp Flex ha transportà l'onn 2017 bunamain 3'000 persunas (maletg d'archiv). RTR, Federico Belotti

Ir cun il bus enstagl da cun l'auto en ils culms: Ils novs trajects dal Bus alpin sajan vegnì duvrads savens. In grond success saja la nova purschida en la val da St. Antönien en il Purtenz. Là hajan ins transportà radund 1'800 persunas, sco l'uniun ha communitgà.

Fitg buns resultats a Bravuogn e Pass da l'Alvra

Las rutas existentas a Bravuogn ed al Pass da l'Alvra èn vegnidas utilisadas fitg savens. Era sin il Chasseral, a Habkern-Lombachalp, Huttwil e Val-de-Charmey ha l'uniun transportà l'onn vargà fitg blers passagiers.

Ils bus da la Greina ed en la Val dal Blegn han transportà quest onn bunamain 7'900 persunas. Quella cifra è in zic pli pitschna che l'onn passa.

RR novitads 10:00

L'uniun «Bus alpin»

L'uniun dal bus alpin è vegnida fundada l'onn 2011. Quell'uniun duai promover in turissem ecologic en las regiuns da muntogna e porscha traffic public en regiuns a l'ur. En tut van radund 70'000 passagiers ad onn cun il bus alpin en las muntognas.