Siglir tar il cuntegn
cuntegn

Svizra Burkhalter na vul betg regalar ina milliarda

Il Cussegl federal na paja betg ina milliarda als pajais da l'ost da l'Uniun europeica senza che la Svizra vesa progress en auters dossiers cun l'UE. Quai ha cusseglier federal Didier Burkhalter ditg en il cussegl dals stans a Berna tar la discussiun dal rapport da la politica da l’exteriur.

Karin Keller-Sutter (PLD/SG) e cusseglier federal Didier Burkhalter (PLD) en discussiun.
Legenda: Karin Keller-Sutter (PLD/SG) e cusseglier federal Didier Burkhalter (PLD) en discussiun. Keystone

Sin dumonda da sia collega da partida Karin Keller-Sutter (SG) ha el respundì ch’eventuals pajaments novs vegnian mess en in context cumplessiv.

Il Cussegl federal saja en questa dumonda dad avis unanim. El haja prendì encunter l’emna passada la dumonda dal departament da l’exteriur e da quel dad economia da preparar ina proposta per ina nova contribuziun da coesiun.

Burkhalter: I vul dapli che mo segns da progress da l'UE

Totala Cussegl dals chantuns.
Legenda: Il Cussegl dals chantuns ha discutà il mardi davart il rapport da la politica da l’exteriur. Keystone

Cura che quella proposta vegnia preschentada al parlament n’è anc betg cler. Quai dependia dal svilup en il rapport cun l’UE. Bain dettia gia segns, che la situaziun sa megliereschia – i veglia dentant «progress concrets en ils dossiers» ha intunà il minister da l’exteriur.

Didier Burkhalter ha pudì prender posiziun uschia a rapports da medias da la fin d'emna. Quels avevan laschà parair che l'agid d'ina milliarda francs succedia senza cundiziuns.

RR novitads 12:00