Il pli impurtant en curt
- Il stemprà «Burglind» ha cun ina sveltezza da 195 km/h mess si in nov record.
- En la Part Sura Bernaisa è in tren ì sur ils binaris ora. Otg persunas èn vegnidas blessadas.
- Ordavant eran trais persunas vegnidas blessadas en Svizra.
- Tant il traffic sin via sco il traffic public è impedì en pliras regiuns.
- Plirs sgols èn vegnids sviads u annullads a Turitg. L'eroport a Basilea è temporarmain stà serrà.
- En pliras regiuns è interrut il current electric ed èn cupitgadas plantas.
- Er en la Frantscha, grondas parts da la Gronda Britannia e l'Irlanda furiescha il medem stemprà. Là sa numna el dentant «Eleanor» e betg «Burglind».
En Svizra han ins mesirà vents cun ina sveltezza da record. Uschia han ils bufs sin il Pilatus cuntanschì enfin 195 km/ha e quels sin il Säntis enfin 146 km/h. Er en la Bassa han ins registrà ferms vents. En tut la Svizra èn plantas crudadas enturn pervi dals vents. Perfin il pignol da Nadal da Berna cun in'autezza da 13 meters e cun in pais da 2,4 tonnas.
Tren sur ils binaris ora
A Lenk en la Part Sura Bernaisa è in tren ì sur ils binaris ora. Tenor la Polizia chantunala èn otg persunas vegnidas blessadas, las bleras levamain. Tenor il president da la vischnanca sajan ils vents burascus stads la raschun per l’accident.
Ulteriurs blessads
Fin uss han las autoritads dumbrà trais ulteriurs blessads en Svizra. En il chantun Lucerna è ina persuna vegnida blessada en fatscha. Quai pervi che la fanestra davant da ses auto è rutta, durant che la persuna seseva en quel.
En il chantun Neuchâtel èn duas persunas pli passadas cupitgadas en consequenza d'in ferm suffel.
Autostrada A1 bloccada
L'autostrada A1 en direcziun da Berna è stada serrada davent da Oensingen en il chantun Soloturn. Plirs vehichels sajan cupitgads pervi dals ferms suffels. Quai ha communitgà la Polizia chantunala. Il traffic è vegnì svià. La via è uss puspè averta.
Impediments dal traffic public
Pervi dals ferms vents e pervi da plantas ch'èn crudadas enturn èn plirs trens da las Viafiers federalas svizras crudads ora e pliras lingias èn interruttas. Uschia per exempel en l'Appenzell u a Turitg.
Er en Grischun ha la lingia tranter Andermatt e Dieni stuì vegnir serrada. Differentas pendicularas han sistì lur manasch ed sin il Lai da Thun na curseschan naginas bartgas la mesemna.
Medemamain èsi da quintar cun impediments e retards sin las plazzas aviaticas svizras: L'eroport a Basilea è stà serrà ed a Turitg ston tscherts sgols vegnir sviads ed intgins ston vegnir annullads.
Persunas serradas en en la pendiculara Pizol
Ord la pendiculara da Pizol en il chantun Son Gagl han ins stuì deliberar diversas persunas. Plantas èn crudadas sin las sugas da la pendiculara. Er en il chantun Lucerna a Melchsee-Frutt ed ad Engelberg han in stuì serrar las pendicularas.
Nagin current electric
En pliras parts da la Svizra è il current electric interrut. Sulettamain en il Giura Bernais sajan 14'000 chasadas temporarmain stadas senza current electric. Quai han communitgà las ovras electricas BKW.
«Burglind» furiescha er en ulteriuras parts da l'Europa
Il stemprà «Burglind» impedescha er tschertas lingias da la viafier en la Germania. Pervia dal vent èn bleras plantas crudadas. Datiers da la citad Dortmund è in tren siglì en ina planta crudada e la locomotiva dal tren è perquai sviada. Er en ulteriuras citads sco Stuttgart hai dà gronds donns en consequenza dal stemprà.
Er las viafiers en ins Pajais Bass èn per part impedidas pervia da vents che buffan cun ina sveltezza dad enfin 130 km/h e sin l'eroport Schiphol ad Amsterdam han pli che 200 sgols stuì vegnir stritgads.
In mort en Frantscha
En Frantscha ha «Eleanor» interrut las lingias d'electricitad en 200'000 chasadas. Tenor indicaziuns uffizialas è ina persunas morta, perquai ch'ina planta è crudada enturn. Tenor ina bilantscha intermediara èn 15 ulteriuras persunas vegnidas blessadas, quatter da quellas grevamain.
Donns en la Gronda Britannia
Er en grondas parts da la Gronda Britannia e l'Irlanda buffa il medem stemprà, là dentant sut il num «Eleanor». Tenor indicaziuns da l'emettur BBC è in um vegnì blessà perquai ch'ina planta è crudada sin ses auto en la Valisa.
En l'Irlanda dal Nord avevan passa 12'000 chasadas nagina electricitad ed en l'Irlanda han ils vents dad enfin 155 km/h perfin interrut l'electricitad en 27'000 chasadas. En la citad Galway ha il stemprà chaschuna inundaziuns.
RR novitads 11:00++