Siglir tar il cuntegn
cuntegn

Svizra Bunas perspectivas per il turissem da stad

Pervi dal svilup economic ed il meglier curs da l'euro è la Svizra dumandada tar ils turists europeics.

Ina regiun da muntogna cun dus viandants e flurs davant.
Legenda: Il KOF fa bunas prognosas per il turissem da stad. Keystone

L'enviern passà ha il turissem svizzer pudì sa revegnir in pau. Quai suenter ch'il ferm franc svizzer aveva flaivlentà quel durant ils ultims onns. Raschun per quai sajan il bun svilup da l'economia en l'exteriur sco er la mitigiaziun dal franc svizzer envers l'euro. A questa conclusiun vegnan ils experts dal post da perscrutaziun da conjunctura da l'ETH (KOF).

Però er las meglras cundiziuns da l'aura e ch'igl ha dà gia baud l'emprima naiv, hajan gidà il turissem. Tenor stimaziuns dal KOF haja dà l'enviern passà 4,6% dapli pernottaziuns che la stagiun d'enviern da l'onn avant.

Tut las regiuns profiteschan

Er per il futur quinta il KOF cun in augment dal dumber da turists en Svizra. La tendenza a l'augment saja clera, tant per il turissem da questa stad sco er per ils proxims dus onns. Da quest svilup duessan tenor il KOF tut las regiuns profitar. La dinamica positiva saja dentant en las citads pli gronda.

RR novitads 12:00