1,2 milliuns francs gudogn ha la Viafier retica fatg l'onn 2017. Quai èn trais giadas dapli ch'anc l'onn avant.
Dapli traffic da persunas e da rauba
Responsabels per l'augment èn il traffic da persunas, sco er il traffic da rauba, uschia la Viafier retica.
Tar il traffic da persunas ha la viafier pudì augmentar la svieuta per 5,2%. Cun ina svieuta da 99,7 milliuns han ins damai manchentà per pauc il cunfin da 100 milliuns francs. D'engraziar è l'augment cunzunt a la gronda dumonda sin il traject Landquart – San Murezzan e San Murezzan – Tiraun. Però er il Glacier Express ha transportà dapli giasts.
- +12,9% Landquart – San Murezzan
- +6,4% San Murezzan – Tiraun
- +11,3% dapli giasts sin il traject dal Glacier Express
E tar il traffic da rauba è la svieuta s'augmentada per 2,9% sin 15,1 milliuns francs. Quai cunzunt era grazia als transports per la renovaziun dal tunnel da l'Alvra.
Record tar Veraina
Passa 497'400 autos èn l'onn passà vegnids transportads tras il Veraina – quai è in nov record. Quest dumber da record ha lura er augmentà la svieuta al Veraina per 8,4%. La raschun èn tenor la viafier la purschida attractiva e las cundiziuns da l'aura difficilas a la fin da l'onn.
Onn da giubileum 10 onns UNESCO e Viafier Retica
Per il giubileum da 10 onns ha la Viafier retica planisà differents programs spezials. Uschia vegni a dar mintga di trens spezials nostalgics tranter Filisur e Tavau u in festival da trens en l ‘Engiadin’Ota.
RR novitads 11:00