Siglir tar il cuntegn

Header

cuntegn

Svizra Bun'investiziun – La milliarda da coesiun per l'Europa

Ils programs d'agid en l'Europa centrala e da l'ost, finanziads cun la milliarda da coesiun svizra èn terminads.

audio
Saira: Contribuziun d'extensiun: bilantscha positiva suenter 10 onns
ord Actualitad dals 19.06.2017.
laschar ir. Durada: 2 minutas 40 Secundas.

Cun la milliarda da coesiun hajan ins pudì sminuir malgistadads economicas e socialas en 10 pajais, communitgescha il departament federal da l'exteriur. Er la Svizra profiteschia però da la constribuziun. Uschia hajan ins pudì rinforzar las relaziuns tar ils novs pajais commembers da l'Uniun europeica.

Profità dals programs han l'Estonia, la Lettonia, la Lituania, Malta, la Pologna, la Slovachia, la Slovenia, la Tschechia, l'Ungaria e Cipra, ils uschenumnads UE-10. Là aveva la Svizra concedì in credit d'ina milliarda francs. Pli tard èn era vegnid vitiers credits da radund 300 milliuns francs per ils pli giuvens stadis da l'UE, la Bulgaria e la Rumenia ch'èn entrads 2007 en l'UE. E la Croazia ch'è entrada il 2013.

210 projects

L'emna passada è scadì il termin da 10 onns per la contribuziun svizra a 10 pajais ch'èn entrads en l'Uniun europeica il 2004. En tut èn vegnids fixads 210 projects, la responsabladad per la realisaziun è stada tar ils partenaris. En tut haja la Svizra pajà 85% dals projects. Tschels 15% hajan il pajais pajà sezs. Mo en dus cas haja la Svizra betg pajà ils daners.

Las contribuziuns èn sa drizzadas tenor la grondezza da la populaziun dal stadi e quant che vegn fadià per tgau en il pajais. Cun bunamain ina mesa milliarda ha la Pologna survegnì ils pli blers daners. Ils daners n'èn dentant betg vegnids en il medem fond da coesiun sco quels da l'UE. La Svizra ha pudì decider autonomamain davart ils projects.

Schebain ch'il termin saja scadì l'emna passada, giaja uss anc in temp enfin che tut ils projects sajan registrads. Per la Rumenia e la Bulgaria valia il termin per la fin 2019 e per la Croazia giaja anc enfin il 2024.

RR actualitad 17:00

Artitgels legids il pli savens