Siglir tar il cuntegn

Header

cuntegn

Svizra Bulieus svizzers gustan meglier

Ils consuments en Svizra vulan mangiar bulieus svizzers. Quels custan trais giadas dapli ch’ils bulieus importads ma quai na disturba para betg ils consuments svizzers.

Tenor il servetsch d’infurmaziun agricul (LID) saja quai cumprovà en ina enquista ch’ils consuments guardan tar ils bulieus fitg sin frestgezza ed sin l’aspect. Ma er la derivanza gioghia ina rolla impurtanta, uschia vegn cità il secretari dals producents da bulieus svizzers Fritz Burkhalter.

90% dals schampignuns consumads en Svizra vegnan ord la Svizra

Ils schampignuns svizzers han ina cumpart da 90% al martgà da detagl. Il volumen da producziun è medemamain s’augmentà ils ultims onns, uschia per exempel gist tar ils schampignuns per radund 900 tonnas ni per 13%.

Bulieus nobels èn el trend

Anc pli auts creschaments pon ils bulieus nobels nudar. Uschia per exempel ils «Austernseitling» per 84% ni era ils bulieus «Schiitake» per 70%. La cumpart da bulieus nobels producids en Svizra n’è betg gronda. Tuttina saja il segment cun bulieus nobels s’etabli en Svizra, ha ditg Burkahlter.

Mintga chasada magia bunamain dus kilos bulieus ad onn

Ina chasada en la Svizra romanda consumescha tenor las cifras dal Uffizi federal d’agricultura 1,75 kilos schampignuns ad onn. En las chasadas da la Svizra tudestga vegn consumà in zic dapli. En tut vegnan 1,86 kilos schampignuns sin las maisas. Sulet cun schampignuns alcs è vegni fatg il 2015 ins svieuta da radund 40 milliuns francs. L'onn passà han ils consuments cumprà en total 5'800 tonnas schampignuns svizzers.

RR novitads 18:00

Artitgels legids il pli savens