Siglir tar il cuntegn
Inhalt

Svizra BSI involvida fermamain en scandal da lavada da daners

Il scandal da finanzas en connex cun il fond statal malaisic 1MDB daventa in desaster per la banca privata BSI. La Finma confiscescha in «gudogn nungiustifitgà» ed ordinescha la schliaziun da la banca. La Procura publica federala avra ina procedura penala ed a Singapur vegn serrada la BSI.

L'impurtant en furma concisa

  • A la BSI vegnan renfatschadas «grevas mancanzas en il cumbat cunter la lavada da daners»
  • Finma confiscescha in gudogn nungiustifitgà da 95 milliuns francs
  • Suenter l’acquisiziun planisada entras l’administratur da facultad EFG sto la banca vegnir schliada
  • Procura publica federala avra ina procedura penala
  • Singapur prenda davent la licenza a la banca

La Procura publica federala ha instradà ina procedura penala cunter la banca privata tessinaisa BSI. Quai pervi da mancos d'organisaziun en connex cun l'affera dal fond statal malaisic 1MDB. Tenor la Procura publica federala avess'ins eventualmain pudì evitar delicts sco corrupziun u lavada da daners suspectus, sche la banca fiss stada organisada meglier.

Era la Surveglianza federala dals martgads da finanzas Finma ha reagì: ella ha confiscà 95 milliuns francs da la BSI, perquai ch’ella n’ha betg respectà las prescripziuns davart la lavada da daners. Ils daners van a la Confederaziun.

Banca sto vegnir schliada cumplettamain

Il schef da la BSI Stefano Coduri ed auters top-managers da la banca sa retiran per immediat da lur posts. Coduri vegn remplazzà cun Roberto Isolani ch`è actualmain commember dal cussegl d’administraziun da la banca.

Igl è gia daditg enconuschent che la BSI duai vegnir surpigliada da la EFG. La cumpra planisada po succeder, quai ha lubì la Finma.

I dat dentant ina cundiziun, numnadamain che la BSI vegn integrada cumplettamain en la EFG. Plinavant sto la BSI vegnir schliada aifer 12 mais. Tenor la Finma na dastgan nagins dals managers responsabels ch’èn culpabels s’engaschar tar la EFG. Per clients e collavuraturs saja la surpigliada dentant positiva, scriva la Finma. A quels vegnia uschia purschida ina perspectiva futura.

Singapur ordinescha serrada

L’autoritad da surveglianza MAS a Singapur ha ordinà la serrada da la banca privata svizra. I vegnia investigà cunter sis managers, uschia l’autoritad.

In anteriur cussegliader da clients da la BSI saja gia vegnì sentenzià, ha confermà la procura publica da Singapur. Il banchier duai tenor rapports medials avair cusseglià il fond statal 1MDPP. I giaja en quest’investigaziun per summas da daners «remartgablas», vegn cità in collavuratur da la procura publica da Singapur.

RR novitads 09:00